Tgi che contempla bain la paraid-crap en la chavorgia, po scuvrir la fatscha d'ina dunna veglia ... 

Tenor la scienza è la chavorgia da Cavagliasco sa furmada sumegliantamain sco las «avnauns dal gigants». Durant il temp da glatsch avant plirs dieschmillis onns era questa regiun cuverta d'in tarment glatscher. Suten ha l'aua da naiv chavà cuntinuadamain questa chavorgia en il grip. L'aua che culava en turnigls ha maglià ora la chavorgia e stgavà furmas extravagantas en il grip. Damai era la fatscha da la dunna ... 

La legenda puschlavina dals vagants da Puntalta

Tenor in raquint da Don Giovanni Vasella è ina famiglia da vagants descendida ina giada en la val ed è arrivada en la chavorgia da Cavagliasco. Ils vagants avevan gronda fom e vulevan arrivar uschè svelt sco pussaivel en il vitg per chattar insatge da mangiar. La mamma veglia, ina dunna falombra, era spussada, unfisa da la vita e na vuleva betg pli cuntinuar il viadi. Quai avess retardà l'arriv a Cavaglia, uschia ch'ils uffants grittentads han stumplà la mamma veglia da la costa giu. Durant la cupitgada ha quella smaladì sia famiglia. Qua èn ils grips visavi sa distatgads ed han stratg ils vagants cun els en la chavorgia. La fatscha da la dunna veglia en la paraid-crap duai avair inspirà questa legenda.