Ina senda nova maina tras la chavorgia da Cavaglia a la fin sidost da la planira auta da Cavaglia. La chavorgia impressiunescha cun sias furmas erosivas bizaras. Las visitadras ed ils visitaders pon admirar las taunas chavadas ora dals turnigls d'aua, ils mulins da glatscher e las surpendenzas da grip giganticas.

L'access a la chavorgia da Cavaglia maina sut la punt da la viafier sur in piogn che cunfinescha cun quella en in angul dretg. Suenter suondan in pèr stgalims fin a l'ur superiur da las surpendenzas da grip e lura vai in tschancun a dretg ora. Ina retscha da surpendenzas grippusas è segirada cun pilasters mirads. Sin il proxim tschancun ves'ins las taunas chavadas en il grip sin la flanca sidvest visavi. 

Sur stgalas descendan las visitadras ed ils visitaders en la chavorgia, nua che s'avran vistas dal tuttafatg novas. 

Davent da la punt a Puntalta cuntinuescha la via sur ina planira cuverta cun guaud. Sur ina stgala arriv'ins sin ina senda che maina pauc pli tard puspè al punct da partenza da la curta spassegiada. 

Per la senda èn stadas necessarias mo intervenziuns minimalas en il terren. Las construcziuns èn vegnidas fatgas cun crappa indigena e s'integreschan a moda armonica en la natira. 

Las differentas tecnicas applitgadas – dals mirs sitgs tradiziunals fin a las plattas da crap tagliadas per la punt sur il Cavagliasco – mussan era las pussaivladads multifaras da l'elavuraziun da crap moderna.